Amarushanwa y’Imbyino Gakondo n’Ubusizi ku rwego rw’Intara y’Iburasirazuba yatangiriye muri Kaminuza ya Rwanda ishami rya Nyagatare (UR Nyagatare Campus), ahahuriye Amatorero atandatu ariyo Intakwanganji za UR_Rwamagana, Ingenzi za RP_Ngoma College, Inshongore za Easter African University of Rwanda–Nyagatare, Indatwa za UR_Nyagatare Campus, Indangamirwa za UR College of Education–Rukara ndetse n’Indakomwa za RP_Gishari College, hiyongeraho n’abasizi 12 bahagarariye izi kaminuza n’amashuri makuru. 

Umuyobozi w’Akarere ka Nyagatare wungirije ushinzwe imibereho myiza y’abaturage, Murekatete Julie, watanze ikaze ku bitabiriye aya marushanwa, yagaragaje ko iyi mikino ari inkingi ikomeye mu kwimakaza umuco n’ubuhanzi nyarwanda, ashimangira ko ifasha urubyiruko kwiga guhanga udushya no gukunda umuco warwo.

Mu byavuye mu marushanwa, Manishimwe Triphonie ufite ubumuga bwo kutabona wa UR_Nyagatare Campus yegukanye umwanya wa mbere mu busizi ahembwa 1,000,000 FRW, naho Tuyisenge Alphonse wa Easter African University of Rwanda aba uwa kabiri ahembwa 500,000 FRW, mu gihe Itorero Indatwa rya UR_Nyagatare ryegukanye umwanya wa mbere mu mbyino gakondo rihembwa 1,500,000 FRW, Indakomwa rya Gishari College riba irya kabiri rihembwa 1,000,000 FRW.