Igikorwa cyo gutangiza ku mugaragaro icyiciro cya 5 cya #NdiUmunyarwanda mu mashuri yisumbuye na Kaminuza cyabereye ku Lycée de Kigali, gitegurwa n’Umuryango Unity Club Intwararumuri ku bufatanye n’inzego za Leta. 

Mu kiganiro cyatanzwe na Minisitiri Utumatwishima Jean Nepo Abdallah, hibanzwe ku “Mateka, Indangagaciro n’Inzitizi zikibangamiye urubyiruko,” agaragaza ko ibiganiro bya #NdiUmunyarwanda bifite uruhare rufatika mu kongera uruhare rw’urubyiruko mu bikorwa by’Igihugu. Yongeyeho ko gutangiza iyi gahunda mu mashuri yisumbuye bishingiye ku mpamvu yo gukumira imyitwarire idahwitse igenda igaragara mu banyeshuri, harimo n’ingengabitekerezo ya Jenoside mu bakiri bato batigeze bayibamo.

 Ibi biganiro kandi byaje kunganira uburere busanzwe butangwa mu muryango, ku ishuri no mu rusengero, hagamijwe gutoza urubyiruko indangagaciro zo kubana neza no kwirinda amacakubiri.