Kuri iki gicamunsi,18.11.2025 Intore ziri mu Itorero “Imbuto Zitoshye” zagize umwanya wo kuganira ku nsanganyamatsiko “Ndi Umunyarwanda: Igitekerezo Ngenga cy’Ukubaho kwacu.” Ikiganiro cyatanzwe na Brave Ngabo, Umunyamabanga Uhoraho muri Minisiteri y’urubyiruko n’iterambere ry’ubuhanzi (MoYA); NTWARI Christian washinze Our Past Initiative; ndetse na Eva Nishimwe, Umuyobozi Wungirije mu kigo cy’Igihugu gishinzwe ibibuga by’indege (Rwanda Airports).

 Mu butumwa bwe, Umunyamabanga Uhoraho Brave Ngabo yibukije Intore ko ikintu cya mbere kibaranga ari Ubunyarwanda, abasaba gukoresha amahirwe bafite bakiri bato no gutangira uyu munsi kubaka ejo hazaza bashaka. Yagize ati: “Icya mbere uri Umunyarwanda, uracyari muto, ufite ubwenge ndetse n’amahirwe. Tangira uyu munsi ukoreshe amahirwe ufite, urebe intumbero yawe utangire kubikorera.”