MoYA, RDB, MINICOM n’izindi nzego bahuye n’abahanzi n'itangazamakuru mu biganiro bigamije kunoza Iteka rya Minisitiri rijyanye n’ikusanya n’isaranganya ry’ibihembo by’ibihangano.

Ku wa Kabiri, MoYA, RDB, MINICOM, n’izindi nzego bahuriye mu nama nyunguranabitekerezo n’inzego z’abahanzi n’itangazamakuru ku mushinga w’Iteka rya Minisitiri rigena uburyo bw’ikusanya n’isaranganya ry’ibihembo byavuye mu gukoresha ibihangano. 

Minisitiri Jean Nepo Abdallah yashimiye abahanzi n’abanyamakuru ku bitekerezo byubaka batanze bigamije kunoza iri Teka, ndetse abashimira ubushake bwo gukorera hamwe no kubahiriza ibisabwa hagamijwe guteza imbere abahanzi no kurengera umutungo bwite mu by’ubwenge.

Umunyamabanga wa Leta Sandrine Umutoni yibukije abahanzi akamaro ko kwandikisha ibihangano byabo, birimo kubongerera umutekano w’ibihangano kugira ngo bititirirwe abandi, ndetse no kubinjiriza amafaranga mu buryo buhoraho bitewe n’uko ababyifashisha bishyura mu buryo bwemewe. 

Abahagarariye inzego z’abahanzi hamwe n’abahagarariye Radio na Televiziyo bashimye uyu mushinga w’Iteka, bemeranya gukomeza ubufatanye mu kuwumenyekanisha no kuwushyira mu bikorwa mu buryo buboneye, hagamijwe guteza imbere uruganda rw’ubuhanzi mu Rwanda.