Minisiteri y’urubyiruko n’iterambere ry’ubuhanzi n’abafatanyabikorwa bayo bibutse abari abakozi ba MIJEUMA n’abandi bazize Jenoside yakorewe Abatutsi mu 1994. Minisitiri w’urubyiruko n’iterambere ry’ubuhanzi Dr. Utumatwishima Jean Nepo Abdallah yibukije urubyiruko, abahanzi n’abakinnyi gukoresha impano zabo mu guharanira ukuri no kurwanya ingengabitekerezo ya Jenoside. 

Minisiteri y’urubyiruko n’iterambere ry’ubuhanzi (MoYA) ku bufatanye na Rwanda Sports, Unity Memory n’ibigo bifitanye isano, bibutse abari abakozi ba MIJEUMA, urubyiruko, abahanzi, abakinnyi, ndetse n’abanyamuryango b’amashyirahamwe bazize Jenoside yakorewe Abatutsi mu 1994. Uyu muhango witabiriwe n’abayobozi batandukanye, imiryango y’abahoze ari abakozi ba MIJEUMA, urubyiruko, abahanzi, abakinnyi n’abandi baje kwifatanya mu guha icyubahiro inzirakarengane zirenga 250,000 zishyinguwe mu rwibutso. Iyi gahunda yabanjirijwe no kunamira no gushyira indabo ku mva zishyinguwemo izo nzirakarengane.

Mu butumwa Minisitiri Utumatwishima Jean Nepo Abdallah na Minisitiri wa siporo Madame Mukazayire Nelly ndetse na Minisitiri w'ubumwe bw'abanyarwanda n'inshingano mboneragihugu Dr. Jean Damascène Bizimana bageneye urubyiruko rwitabiriye iyi gahunda, basabye urubyiruko muri rusange harimo abahanzi n’abakinnyi gukoresha impano zabo haba mu majwi, amashusho, inyandiko, ikoranabuhanga, imikino n’ibindi  mu guharanira ukuri, kwamagana ingengabitekerezo ya Jenoside no guhangana n’ibinyoma by’abashaka gusebya u Rwanda n’amateka yarwo.