Ku wa 28 Werurwe 2025, mu Kigo cy’Ubutore cya Nkumba, habereye  gahunda ya Rubyiruko Menya Amateka Yawe, iyobowe na Minisitiri Jean Nepo Abdallah, yitabirwa n’urubyiruko rugera ku 1,000 ruvuye mu turere twose tugize Intara y’Amajyaruguru n’Akarere ka Nyabihu.

Iyi gahunda igamije gufasha urubyiruko gusobanukirwa amateka y’u Rwanda, gushimangira indangagaciro z’ubunyarwanda, no kubaka urubyiruko rwiteguye guhangana n’ibinyoma bivugwa ku gihugu cyabo.

Guverineri w’Intara y’Amajyaruguru, Gahunde Maurice, yatanze ijambo ry’ikaze, asaba  urubyiruko gukomeza kwigira ku mateka y’Igihugu no kuyasangiza bagenzi babo, mu rwego rwo kurwanya amakuru y’ibinyoma avugwa kuri Rwanda.

Minisitiri Jean Nepo Abdallah yibukije urubyiruko ko kumenya amateka ari umusingi ukomeye w’ukwigira no kwigirira icyizere, anabasaba kurangwa n’ikinyabupfura no gukunda igihugu. 

Iyi gahunda ya Rubyiruko Menya Amateka Yawe ikomeje kuba urubuga rw’ingirakamaro rwo gutoza urubyiruko ubumenyi n’indangagaciro zo kurengera umurage w’igihugu, ishyirwa mu bikorwa ku bufatanye n’inzego zitandukanye ziyemeje gufasha urubyiruko kuba inkingi y’iterambere rirambye.