Tariki 24 Ukwakira 2024, Minisitiri w'Urubyiruko n’Iterambere ry’Ubuhanzi, Utumatwishima Jean Nepo Abdallah, ari kumwe n’Umunyamabanga Nshingwabikorwa w’Inama y’Igihugu y’Urubyiruko Ngabo Brave, batangije inama mpuzabikorwa y’iminsi ibiri. Iyi nama iba igamije kugaragaza ibyavuye mu isuzuma ry’imihigo y’Inama y’Igihugu y’Urubyiruko.

Atangiza Inama Mpuzabikorwa yibanda ku Mihigo y'Urubyiruko, Minisitiri yasabye urubyiruko ruri mu nzego n’abahuzabikorwa b’Inama y’Igihugu y’Urubyiruko gufata iya mbere mu gukemura ibibazo byugarije abaturage aho baba, kuvugisha ukuri no gufata inshingano. Yaboneyeho gushimira abafatanyabikorwa barimo ActionAid Rwanda na CLADHO ku bwitange bwabo mu guteza imbere ibikorwa by'urubyiruko.