Minisitiri Abdallah Utumatwishima yifatanyije n’Akarere ka Rubavu na Vision Jeunesse mu muhango wo gutanga ibihembo bya Rubavu Music Awards – Edition 2, aho hahembwe abanyempano n’abahanzi babigize umwuga bahize abandi bo mu Karere ka Rubavu.

Mu ijambo rye, Minisitiri Utumatwishima yashimiye Vision Jeunesse, ubuyobozi bw’Akarere ka Rubavu, Abikorera, Itangazamakuru ndetse n’Abahanzi muri rusange ku ruhare bagize mu gutegura Rubavu Music Awards. Yanifurije abahanzi ubuzima bwiza ndetse anabashishikariza gukomeza guteza imbere impano zabo no gukoresha ibihangano byabo mu guteza imbere umuco n’iterambere ry’Igihugu.