Minisiteri y’Urubyiruko n’Iterambere ry’Ubuhanzi (MoYA), ku bufatanye n’abafatanyabikorwa batandukanye, yatangije amahugurwa y’iminsi umunani agamije kwiteza imbere no kwihangira imirimo ku rubyiruko rusaga 250 ruturutse mu turere dutandukanye tw’igihugu.

Mu Kigo cy’Ubutore cya Nkumba, Minisiteri y’Urubyiruko n’Iterambere ry’Ubuhanzi (MoYA)  Yakiriye urubyiruko ruturutse mu Turere twa Nyarugenge, Nyanza, Nyamagabe, Rwamagana na Ngoma, aho bagiye kumara iminsi umunani (8) mu mahugurwa agamije kwiteza imbere no kwihangira imirimo.

Aya mahugurwa ari gutangwa kuva tariki ya 4 kugeza ku ya 11 Ukuboza, ku bufatanye bwa MoYA n’abafatanyabikorwa bayo, akaba yitabiriwe n’urubyiruko rusaga 250. Muri uru rubyiruko harimo abafite ibibazo byihariye, abana b’abakobwa babyaye bakiri bato, abafite ubumuga, ndetse n’abavuye mu bigo ngororamuco, bose bahurijwe hamwe mu rugendo rwo kwiyubaka no kwiteza imbere.

Urubyiruko rwitabiriye amahugurwa ruri gufashwa n’Imbuto Foundation gusobanukirwa ubuzima bwo mu mutwe ndetse n’urugendo rwo gukira ibikomere byo ku mutima, nk’imwe mu nkingi z’ingenzi zo kubaka ejo hazaza heza.

Abakozi ba SFH Rwanda, Mizero Salma na Bizimana Etienne, bahuguye urubyiruko ku buzima bw’imyororokere, kurwanya no gukumira virusi itera Sida, ndetse n’izindi ndwara zandurira mu mibonano mpuzabitsina.

Ba rwiyemezamirimo bakiri bato, Sumayiya na Antoinette, baganirije urubyiruko bagenzi babo ku rugendo rwabo mu buhinzi n’ubworozi, babashishikariza kwihangira imirimo no kwirinda ibishuko, bagaragaza ko bishoboka guhera kuri bike ukagera kuri byinshi.

Urubyiruko rwahuguwe kandi ku kamaro ko gukorera muri koperative, amahame agenga amakoperative mu Rwanda, inzego z’ubuyobozi n’ububasha bwazo, inshingano z’inama y’ubuyobozi n’inama y’ubugenzuzi. Aya mahugurwa yatanzwe na Rwanda Cooperative Agency (RCA).

DOT Rwanda yahuguye urubyiruko ku guteza imbere ibitekerezo by’imishinga ibyara inyungu, aho bakoze imikorongiro yo gushaka ibisubizo by’ibibazo biri aho batuye bifashishije Kubaka Ishusho y’Umushinga .

Ikigo cy’Igihugu Gishinzwe Imikurire no Kurengera Umwana (NCDA) cyatanze ikiganiro cyibanze kuri politiki n’amategeko arengera umwana, inshingano z’ababyeyi n’abayobozi, ibibazo bibangamiye abana, ndetse n’uruhare rwa buri wese mu kurengera umwana.